“నేను కవితను కాదు నాన్నా… నీ ఉద్యమాన్ని ప్రేమించిన బిడ్డను!”

• కవితకు బతుకమ్మ… కేటీఆర్‌కు బీఆర్ఎస్!
• వారసత్వ రాజకీయం… ప్రేమలోని అసమానత్వం!

హైదరాబాద్, జూన్ 15 (విశ్వం న్యూస్): తెలంగాణ రాజకీయాల్లో కేసీఆర్ ఒక సంచలన నాయకుడు. ఉద్యమాన్ని నడిపి, రాష్ట్రాన్ని సాధించి, రెండు పర్యాయాలు అధికారాన్ని నిలబెట్టుకున్న నేత. ఆయన చాణక్య విధానాలు, రాజకీయ వ్యూహాలు అందరికీ తెలుసు. కానీ, కుటుంబంలోనూ అదే వ్యూహాలను వర్తింపజేసిన తీరు ఇప్పుడు దేశవ్యాప్తంగా చర్చనీయాంశమైంది. ముఖ్యంగా, తన కుమార్తె కల్వకుంట్ల కవిత విషయంలో చూపిన వైఖరి — రాజకీయ వారసత్వంపై పెద్ద ప్రశ్నలను విసురుతోంది.

కవిత తెలంగాణ ఉద్యమంలో తనకంటూ ప్రత్యేక గుర్తింపు తెచ్చుకున్నారు. ఎమ్మెల్సీగా, ఎంపీగా సేవలందించారు. బతుకమ్మను అంతర్జాతీయ స్థాయిలో తీసుకెళ్లిన దిశగా చైతన్యవంతమైన నాయకురాలిగా ప్రజల్లో బలంగా నిలిచారు. కానీ పార్టీ పతనమవుతున్న సంక్షోభ సమయంలోనూ ఆమెకు ఏ కీలక పదవిని ఇవ్వకపోవడం — నిండుగా తిరిగే ప్రశ్న.

ఇదే సమయంలో కేసీఆర్ కుమారుడు కల్వకుంట్ల తారకరామారావు (కేటీఆర్)కి మాత్రం పార్టీ అధ్యక్ష బాధ్యతలు అప్పగిస్తూ, స్పష్టమైన వారసత్వ సంకేతం ఇచ్చారు. ప్రజల్లో పోటీకి నిలిచే సామర్థ్యం కవితలో లేకపోయిందా? ఆమె సేవలు తక్కువైపోయాయా? అసలైన కారణం ఏమిటంటే — ఆమె “ఆడపిల్ల”.

ఇది కేవలం కేసీఆర్ వ్యక్తిగత నిర్ణయంగా కాకుండా, మన సమాజంలోనూ, రాజకీయాల్లోనూ విస్తృతంగా ఉండే పితృస్వామ్య దృక్కోణానికి నిదర్శనం. “ఆడపిల్లకి అంత వరకు చాలు. అధికారం మాత్రం కొడుక్కే” అన్న సంకేతం బలంగా వినిపించింది. ఈ తరహా వైఖరులు, మహిళా నాయకత్వాన్ని పూర్తిగా నిరుత్సాహపరుస్తాయి.

వాస్తవానికి, కవితకు రాజకీయంగా మరింత కీలక పాత్ర ఇవ్వాల్సిన అవసరం పార్టీలో స్పష్టంగా ఉంది. పార్టీ ఓటమికి బలమైన నూతన ముఖాలు, ప్రజలతో మమేకమయ్యే నాయకత్వం అవసరమవుతుందనేది రాజకీయ విశ్లేషకుల అభిప్రాయం. అలాంటి సమయంలో, అప్పటికే ప్రజల మధ్య తిరుగుతున్న నాయకురాలిని పక్కన పెట్టి కుటుంబ వారసత్వాన్ని బలపరచడం — ప్రజాస్వామ్యపు విలువలకు విరుద్ధం.

• ఇప్పటికైనా ప్రశ్నించాల్సిన సమయం ఇది:
• కవితకు రాజకీయంగా సమాన అవకాశాలు
  ఇవ్వకపోవడంలో ఎంతమేరకు న్యాయం ఉంది?
• పార్టీకి నాయకత్వం అనేది సామర్థ్యం ఆధారంగా రావాలా? లేక బంధుత్వం ఆధారంగా?
• కేసీఆర్ వంటి ఉద్యమ నాయకుడే తన కుటుంబంలో లింగ సమానత్వాన్ని పాటించకపోతే, ఆయన బోధించిన “తెలంగాణకు న్యాయం” వాస్తవానికి ఎంత నిబద్ధంగా ఉందనే ప్రశ్న లేవదు?

ఈ తరహా నిర్ణయాలు భారతీయ రాజకీయాల్లో కొత్తవి కావు. కానీ ప్రజల మద్దతుతో వచ్చిన పార్టీలు ఈ పాతపాటి పితృస్వామ్య భావజాలాన్ని కొనసాగిస్తే — ప్రజాస్వామ్య స్ఫూర్తిని తక్కువ చేసే ప్రక్రియకి పాల్పడినట్టే.

సమానత్వం మాటల్లో కాదు, కార్యాచరణలో కనిపించాలి.
కవిత కన్నీరు బాధించకపోవచ్చు. కానీ సమాజం ఆ మౌనాన్ని తప్పనిసరిగా గమనిస్తోంది.