ఔట్డోర్ మీడియా రంగంలో
రేవంత్ రెడ్డి దోపిడి:డా.దాసోజు
- గుప్పెడుమంది లాభం కోసం లక్షల కుటుంబాల ఉపాధి ప్రమాదంలో పడుతోంది
హైదరాబాద్, మార్చి 7 (విశ్వం న్యూస్) : తెలంగాణ ప్రభుత్వం తీసుకొచ్చిన జీఓ నం.84 ఔట్డోర్ అడ్వర్టైజింగ్ రంగాన్ని కుదేలుచేసే విధంగా ఉందని బీఆర్ఎస్ ఎమ్మెల్సీ డా. దాసోజు శ్రవణ్ విమర్శించారు. ఇది కొందరు వ్యక్తులకు లబ్ధి చేకూర్చేందుకే తీసుకొచ్చిన నిర్ణయమని ఆయన ఆరోపించారు. శనివారం తెలంగాణ ఔట్డోర్ మీడియా ఓనర్స్ అసోసియేషన్ ప్రతినిధులు ఆయనను కలిసి తమ సమస్యలను వివరించారు.
ఉపాధిపై తీవ్ర ప్రభావం : రాష్ట్రవ్యాప్తంగా ఈ రంగంలో సుమారు 400 ఏజెన్సీలు పనిచేస్తున్నాయని, లక్షకు పైగా కార్మికులు ప్రత్యక్షంగా ఉపాధి పొందుతున్నారని శ్రవణ్ తెలిపారు. మొత్తంగా ఐదు లక్షల మంది జీవనాధారం ఈ రంగంపై ఆధారపడి ఉందని చెప్పారు. జీఓ 84 వల్ల చిన్న ఏజెన్సీలకు భారీ దెబ్బ తగిలే ప్రమాదం ఉందన్నారు.
బిల్బోర్డ్స్ రద్దుతో నష్టాలు : రాష్ట్రంలో ఉన్న సుమారు 3000 యాడ్స్, బిల్బోర్డ్స్ను రద్దు చేయడం వల్ల చిన్న ఏజెన్సీలు తీవ్రంగా నష్టపోతాయని పేర్కొన్నారు. ప్రభుత్వానికి వచ్చే కోట్లాది రూపాయల ఆదాయాన్ని కూడా ఈ నిర్ణయం ప్రభావితం చేస్తుందని ఆయన అభిప్రాయపడ్డారు.
పెద్ద కంపెనీలకు లాభం?: ఈ నిర్ణయం ద్వారా కేవలం 3–4 పెద్ద సంస్థలకు మాత్రమే అవకాశాలు కల్పించే పరిస్థితి ఏర్పడుతుందని శ్రవణ్ ఆరోపించారు. వందల కోట్ల విలువైన ఈ పరిశ్రమ కొద్ది సంస్థల చేతుల్లోకి వెళ్లే ప్రమాదం ఉందన్నారు.
పర్యావరణంపై ఆందోళన : కేబీఆర్ పార్క్ పరిసరాల్లో పర్యావరణ నిబంధనలకు విరుద్ధంగా భారీ ఎల్ఈడీ బోర్డులు ఏర్పాటు చేస్తున్నారని ఆయన ఆరోపించారు. దీని వల్ల అక్కడి వన్యప్రాణులపై ప్రతికూల ప్రభావం పడే అవకాశం ఉందని చెప్పారు.
ప్రభుత్వం వెంటనే జీఓ 84ను పునఃపరిశీలించి చిన్న ఏజెన్సీలను రక్షించాలని శ్రవణ్ కోరారు. లేదంటే బాధితుల తరఫున న్యాయపోరాటం చేపడతామని హెచ్చరించారు.