హైదరాబాద్, ఏప్రిల్ 19 (విశ్వం న్యూస్): నగర ప్రయాణికులకు ఊరట కలిగించే కీలక నిర్ణయానికి తెలంగాణ ప్రభుత్వం సిద్ధమవుతోంది. రోజువారీ ఖర్చులతో ఇబ్బంది పడుతున్న మధ్యతరగతి, సామాన్య ప్రజలకు సహాయంగా ఎంఎంటీఎస్ (MMTS) రైళ్లలో ఉచిత ప్రయాణం కల్పించే పథకాన్ని అమలు చేయాలని యోచిస్తోంది. ఈ పథకాన్ని తెలంగాణ ఆవిర్భావ దినం జూన్ 2 నుంచి ఏడాది పాటు ప్రయోగాత్మకంగా అమలు చేయాలని ప్రభుత్వం భావిస్తోంది. ఫలితాలను బట్టి తర్వాత కొనసాగింపుపై నిర్ణయం తీసుకోనుంది.
ట్రాఫిక్ సమస్యకు పరిష్కారంగా ప్లాన్ : హైదరాబాద్లో రోజు రోజుకీ పెరుగుతున్న ట్రాఫిక్ రద్దీ, కాలుష్యం, ఇంధన వ్యయం నేపథ్యంలో ప్రజా రవాణాను ప్రోత్సహించాలని ప్రభుత్వం నిర్ణయించింది. రోజూ లక్షలాది వాహనాలు రోడ్లపైకి రావడంతో ప్రయాణ సమయం పెరగడం, కాలుష్యం అధికమవడం వంటి సమస్యలు తీవ్రంగా మారాయి. ఈ నేపథ్యంలో ఎంఎంటీఎస్ ఉచిత ప్రయాణం ద్వారా ఎక్కువ మంది ప్రజలు రైలు ప్రయాణాన్ని ఎంచుకుంటారని, దీంతో రోడ్డు రద్దీ తగ్గుతుందని అధికారులు అంచనా వేస్తున్నారు.
సీఎం గ్రీన్ సిగ్నల్ – అధికారుల చర్యలు : ఈ ప్రతిపాదనకు ముఖ్యమంత్రి Revanth Reddy ఇప్పటికే గ్రీన్ సిగ్నల్ ఇచ్చారు. మార్చి 26న ఎంఎంటీఎస్ సేవలపై జరిగిన సమీక్షలో సీఎం చేసిన సూచనల మేరకు అధికారులు చర్యలు ప్రారంభించారు. ఏప్రిల్ 16న జరిగిన కీలక సమావేశంలో తెలంగాణ చీఫ్ సెక్రటరీ రామకృష్ణారావు, దక్షిణ మధ్య రైల్వే జనరల్ మేనేజర్ సంజయ్ కుమార్ శ్రీవాస్తవతో చర్చలు జరిపారు. రాష్ట్ర ప్రభుత్వం-రైల్వే మధ్య ఇది మొదటి సమన్వయ సమావేశం కావడం గమనార్హం.
రైల్వేకు ప్రతిపాదన పంపిన ప్రభుత్వం : ఈ పథకం అమలుకు సంబంధించి రాష్ట్ర ప్రభుత్వం ఇప్పటికే దక్షిణ మధ్య రైల్వేకు అధికారికంగా లేఖ పంపింది. రైల్వే అనుమతి లభించిన వెంటనే అమలు దిశగా ముందడుగు పడే అవకాశం ఉంది. ఈ పథకం అమలైతే నగర ప్రజలకు ప్రయాణంలో పెద్ద ఎత్తున ఆర్థిక ఉపశమనం కలగనుంది.