తాండూరు కందిపప్పుకు గుడ్‌బై చెప్పే కుట్ర!

• మూడు నెలల టెండర్ల వెనుక భారీ కమీషన్ గేమ్?
• జిల్లా కలెక్టర్లను పక్కనబెట్టడంపై ఆగ్రహం
• ఆఫ్రికా నాసిరకం పప్పులతో విద్యార్థుల ఆరోగ్యానికి ముప్పు
• రూ.165 కోట్ల టర్నోవర్ నిబంధనపై తీవ్ర విమర్శలు
• చిన్న వ్యాపారులు, మహిళా సంఘాల గొంతు నొక్కుతున్నారా?
• బంకర్ బెడ్లు, యూనిఫారాల కుంభకోణాలపై మళ్లీ దుమారం
• “కేసీఆర్ ప్రభుత్వం వస్తే న్యాయ విచారణ తప్పదు”
• ముఖ్యమంత్రి రేవంత్ రెడ్డికి ఎమ్మెల్సీ డా. దాసోజు శ్రవణ్ బహిరంగ లేఖ

హైదరాబాద్, మే 23 (విశ్వం న్యూస్) : రాష్ట్రంలోని గురుకుల విద్యాసంస్థల కిరాణా సరుకుల కొనుగోళ్లలో భారీ స్థాయి అవినీతి కుట్ర జరుగుతోందని ఎమ్మెల్సీ డా. దాసోజు శ్రవణ్ తీవ్ర ఆరోపణలు చేశారు. ఈ మేరకు ముఖ్యమంత్రి Revanth Reddy కు బహిరంగ లేఖ రాసిన ఆయన, “రూ.500 కోట్ల విలువైన కొనుగోళ్లను కేంద్రీకృతం చేసి కొందరు ప్రైవేట్ సంస్థలకు లాభాలు చేకూర్చే ప్రయత్నం జరుగుతోంది” అని మండిపడ్డారు.

జిల్లా కలెక్టర్లు, ఐఏఎస్ అధికారుల పర్యవేక్షణలో ఇప్పటివరకు పారదర్శకంగా సాగుతున్న కొనుగోలు విధానాన్ని పక్కనబెట్టి, కేవలం మూడు నెలల కాలపరిమితితో కేంద్రీకృత టెండర్ల విధానాన్ని తీసుకురావడం వెనుక భారీ కమీషన్ల దందా ఉందని ఆరోపించారు. “కేవలం రూ.100 కోట్ల కమీషన్ల కోసమే ఈ విధానం తీసుకొస్తున్నారు. ఏడాది టెండర్ల పేరుతో ప్రభుత్వ ఖజానాకు వందల కోట్ల నష్టం కలిగించే కుట్ర జరుగుతోంది” అని విమర్శించారు.

తెలంగాణలో ప్రసిద్ధి చెందిన తాండూరు కందిపప్పును పక్కనబెట్టి, నాసిరకం విదేశీ పప్పులను కొనుగోలు చేసే ప్రయత్నం జరుగుతోందని దాసోజు శ్రవణ్ ఆందోళన వ్యక్తం చేశారు. “ఆఫ్రికా దేశాల నుంచి దిగుమతి చేసే నాణ్యతలేని పప్పులతో పేద విద్యార్థుల ఆరోగ్యాన్ని ప్రమాదంలోకి నెట్టేస్తున్నారు” అని అన్నారు. స్థానిక రైతులకు, చిన్న వ్యాపారులకు ఇది తీవ్ర దెబ్బ అవుతుందని పేర్కొన్నారు.

రూ.165 కోట్ల టర్నోవర్ నిబంధన విధించడం ద్వారా స్థానిక చిన్న వ్యాపారులు, మహిళా సంఘాలు (SHGs) టెండర్ల ప్రక్రియ నుంచి బయటకు వెళ్లే పరిస్థితి తీసుకొచ్చారని ఆయన విమర్శించారు. “ఇది పెద్ద కార్పొరేట్ కంపెనీలకు లాభం చేకూర్చే విధానం తప్ప, పేదల సంక్షేమానికి సంబంధించినది కాదు” అని వ్యాఖ్యానించారు.

“కేంద్రీకరణే మేలైతే ప్రైవేట్ కాంట్రాక్టర్ల అవసరం ఏమిటి? ప్రభుత్వ సంస్థ అయిన MARKFED ద్వారా నేరుగా కొనుగోలు చేయవచ్చు కదా” అని ప్రశ్నించారు. గతంలో గురుకులాల్లో బంకర్ బెడ్లు, యూనిఫారాల కొనుగోళ్లలో భారీ అవినీతి ఆరోపణలు వచ్చాయని, ఆ అంశాలపై ఇప్పటికే హైకోర్టులో కేసులు ఉన్నప్పటికీ ప్రభుత్వం మారలేదని ఆరోపించారు.

పేద విద్యార్థుల నోటి కూడు కొట్టే విధానాలను ప్రజలు క్షమించరని హెచ్చరించిన దాసోజు శ్రవణ్, “రాబోయే కేసీఆర్ ప్రభుత్వంలో ఈ కొనుగోళ్లపై సమగ్ర న్యాయ విచారణ తప్పదు. ప్రజాధనం దోచుకున్న వారిపై చట్టపరమైన చర్యలు తీసుకుంటాం” అని స్పష్టం చేశారు. గురుకుల విద్యార్థుల భవిష్యత్తుతో ఆటలాడే నిర్ణయాలను ప్రభుత్వం వెంటనే వెనక్కి తీసుకోవాలని డిమాండ్ చేశారు.