హైదరాబాద్, జూన్ 1, (విశ్వం న్యూస్):తెలంగాణ రాష్ట్ర ఆర్థిక పరిస్థితి ప్రస్తుతం ఆశాజనకంగా లేదని, ఆదాయానికి-వ్యయానికి మధ్య భారీ అంతరం ఏర్పడిందని ఉప ముఖ్యమంత్రి, ఆర్థిక శాఖ మంత్రి Bhatti Vikramarka కాంగ్రెస్ పార్టీ ఎమ్మెల్యేలకు స్పష్టం చేసినట్లు సమాచారం. రాష్ట్ర ఖజానాపై పెరుగుతున్న భారం కారణంగా కొత్త సంక్షేమ పథకాల అమలు, అభివృద్ధి కార్యక్రమాల వేగవంతం ప్రస్తుతం సాధ్యం కావడం లేదని ఆయన వెల్లడించినట్లు తెలిసింది.
నెలకు రూ.2,200 కోట్ల లోటు: ఉమ్మడి జిల్లాల వారీగా ఎమ్మెల్యేలు, మంత్రులతో నిర్వహిస్తున్న సమావేశాల్లో భట్టి విక్రమార్క రాష్ట్ర ఆర్థిక పరిస్థితిని వివరించినట్లు పార్టీ వర్గాలు చెబుతున్నాయి. రాష్ట్రానికి వస్తున్న ఆదాయం కంటే ఖర్చులు ఎక్కువగా ఉండటంతో ప్రతి నెలా సుమారు రూ.2,200 కోట్ల వరకు లోటు ఏర్పడుతోందని ఆయన వివరించినట్లు సమాచారం.
కొత్త పథకాలకు బ్రేక్: ప్రస్తుతం ఉన్న సంక్షేమ పథకాలను కొనసాగించడమే ప్రభుత్వానికి పెద్ద సవాలుగా మారిందని, కొత్త పథకాలు ప్రకటించే పరిస్థితి లేదని సమావేశాల్లో స్పష్టంచేసినట్లు తెలుస్తోంది. మరోవైపు అమల్లో ఉన్న పథకాలను ఉపసంహరించుకునే అవకాశం కూడా లేకపోవడంతో ప్రభుత్వం ఆర్థిక ఒత్తిడిని ఎదుర్కొంటోందని పేర్కొన్నట్లు సమాచారం.
అప్పులు చేసినా ఉపశమనం లేదు: రాష్ట్ర అవసరాల కోసం కొత్త రుణాలు తీసుకొస్తున్నప్పటికీ వాటి వల్ల ఆశించిన స్థాయిలో ప్రయోజనం కనిపించడం లేదని భట్టి ఎమ్మెల్యేలకు వివరించినట్లు తెలిసింది. ప్రస్తుతం “రోజు గడిస్తే చాలు” అన్నట్లుగా పరిస్థితి ఉందని ఆయన వ్యాఖ్యానించినట్లు పార్టీ వర్గాలు చెబుతున్నాయి.
కాస్త ఓపిక పట్టాలని సూచన: ఆర్థిక పరిస్థితి కుదుటపడే వరకు ప్రజాప్రతినిధులు సహనంతో వ్యవహరించాలని, నియోజకవర్గాల్లో అభివృద్ధి పనుల విషయంలో కొంత సమయం ఇవ్వాలని ఎమ్మెల్యేలకు భట్టి సూచించినట్లు సమాచారం. పరిస్థితి మెరుగుపడిన వెంటనే అభివృద్ధి కార్యక్రమాలకు నిధులు కేటాయించే ప్రయత్నం చేస్తామని హామీ ఇచ్చినట్లు తెలుస్తోంది.
ప్రజలకు వాస్తవాలు చెప్పాలి : రాష్ట్ర ఆర్థిక పరిస్థితిని ప్రజలకు అర్థమయ్యేలా వివరించాలని, ప్రభుత్వంపై అనవసర అపోహలు ఏర్పడకుండా చూడాలని ఎమ్మెల్యేలకు ఉప ముఖ్యమంత్రి సూచించినట్లు సమాచారం. ఆదాయం పెంచేందుకు కొత్త మార్గాలు, వినూత్న ఆలోచనలు ఉంటే ప్రభుత్వానికి తెలియజేయాలని కూడా ఆయన ప్రజాప్రతినిధులను కోరినట్లు తెలుస్తోంది.
జిల్లాల వారీగా సమావేశాలు: ప్రభుత్వం ఏర్పడి రెండున్నరేళ్లు పూర్తవుతున్న నేపథ్యంలో పార్టీ ప్రజాప్రతినిధులకు వాస్తవ పరిస్థితులను తెలియజేయాలనే ఉద్దేశంతో భట్టి విక్రమార్క ఉమ్మడి జిల్లాల వారీగా సమావేశాలు నిర్వహిస్తున్నారు. ఇప్పటికే ఉమ్మడి కరీంనగర్, వరంగల్, నల్గొండ జిల్లాల ఎమ్మెల్యేలు, మంత్రులతో సమావేశమైన ఆయన రాష్ట్ర ఆర్థిక పరిస్థితిపై సమగ్రంగా చర్చించినట్లు సమాచారం.
రాజకీయ వర్గాల్లో చర్చ: రాష్ట్ర ఆర్థిక పరిస్థితిపై ప్రభుత్వం అంతర్గతంగా చేస్తున్న ఈ సమీక్ష, ఎమ్మెల్యేలకు ఇస్తున్న సూచనలు రాజకీయ వర్గాల్లో చర్చనీయాంశంగా మారాయి. రాబోయే రోజుల్లో ప్రభుత్వం ఆదాయం పెంపు కోసం ఎలాంటి నిర్ణయాలు తీసుకుంటుందన్న దానిపై ఆసక్తి నెలకొంది.