హైదరాబాద్, జూన్ 15 (విశ్వం న్యూస్): ఆంధ్రప్రదేశ్ ఉప ముఖ్యమంత్రి పవన్ కళ్యాణ్ తెలంగాణ రాష్ట్ర ఏర్పాటుపై చేసిన వ్యాఖ్యలు తెలంగాణ రాజకీయాల్లో కొత్త చర్చకు దారితీశాయి. ఢిల్లీలో జరిగిన ఓ కార్యక్రమంలో ఉమ్మడి ఆంధ్రప్రదేశ్ విభజన తీరును విమర్శిస్తూ పవన్ కళ్యాణ్ చేసిన వ్యాఖ్యలపై తెలంగాణ పీసీసీ అధ్యక్షుడు మహేశ్ కుమార్ గౌడ్ తీవ్రస్థాయిలో స్పందించారు.
తెలంగాణ రాష్ట్ర ఆవిర్భావాన్ని పవన్ కళ్యాణ్ పదేపదే కించపరుస్తున్నారని మహేశ్ కుమార్ గౌడ్ ఆరోపించారు. తెలంగాణ రాష్ట్ర సాధన కోసం దశాబ్దాల పాటు సాగిన ఉద్యమానికి కాంగ్రెస్ పార్టీనే న్యాయం చేసిందని, రాష్ట్ర ఏర్పాటు ప్రజల ఆకాంక్షలకు అనుగుణంగానే జరిగిందని ఆయన పేర్కొన్నారు. తెలంగాణ ఏర్పాటును తమ పార్టీ ఎప్పుడూ వ్యతిరేకించలేదని చెబుతున్న పవన్ కళ్యాణ్, అదే సమయంలో విభజన ప్రక్రియను విమర్శించడం ద్వారా రాష్ట్ర ఆవిర్భావాన్ని తక్కువ చేసి చూపే ప్రయత్నం చేస్తున్నారని విమర్శించారు.
పవన్ కళ్యాణ్ స్వతంత్రంగా మాట్లాడటం లేదని, బీజేపీ నాయకులు చెప్పిన మాటలనే తిరిగి చెబుతున్నారని మహేశ్ కుమార్ గౌడ్ ఆరోపించారు. బీజేపీ ఆడించినట్టు ఆడే తోలుబొమ్మగా పవన్ మారిపోయారని వ్యాఖ్యానించారు. తెలంగాణ రాష్ట్ర ఆవిర్భావాన్ని ప్రధాని నరేంద్ర మోదీతో పాటు బీజేపీ నాయకులు కూడా పలుమార్లు కించపరిచేలా మాట్లాడారని, ఇప్పుడు అదే ధోరణిని పవన్ కళ్యాణ్ కొనసాగిస్తున్నారని విమర్శించారు.
రాజకీయాలు సినిమా కాదని, బాధ్యతాయుతమైన పదవిలో ఉన్న వ్యక్తులు వాస్తవాలను తెలుసుకుని మాట్లాడాలని మహేశ్ కుమార్ గౌడ్ హితవు పలికారు. కాంగ్రెస్ పార్టీపై విమర్శలు చేయాలంటే సినిమా డైలాగులు చెప్పినట్లు కాకుండా చారిత్రక వాస్తవాలను అధ్యయనం చేసి మాట్లాడాలని సూచించారు. ప్రస్తుతం కూడా సినిమా షూటింగ్లో ఉన్నట్టు పవన్ కళ్యాణ్ వ్యవహరిస్తున్నారని ఎద్దేవా చేశారు.
పవన్ కళ్యాణ్ వ్యాఖ్యలపై బీఆర్ఎస్ అధినేత కేసీఆర్, పార్టీ వర్కింగ్ ప్రెసిడెంట్ కేటీఆర్ లేదా ఇతర నాయకులు స్పందించకపోవడం కూడా అనుమానాలకు తావిస్తోందని మహేశ్ కుమార్ గౌడ్ అన్నారు. ఈ మౌనం వెనుక రాజకీయ ఒప్పందం ఏమైనా ఉందా అనే సందేహాలు వ్యక్తమవుతున్నాయని వ్యాఖ్యానించారు.
ఆంధ్రప్రదేశ్లో ప్రజలు ఎదుర్కొంటున్న సమస్యలు అనేకం ఉన్నాయని, వాటి పరిష్కారంపై దృష్టి సారించాల్సిన అవసరం ఉందని ఆయన పేర్కొన్నారు. తెలంగాణ అంశాలపై వివాదాస్పద వ్యాఖ్యలు చేయడం కంటే ప్రజలకు ఇచ్చిన హామీల అమలుపై దృష్టి పెట్టాలని పవన్ కళ్యాణ్కు సూచించారు. రాజకీయాల్లో ఇంకా ఎంతో నేర్చుకోవాల్సి ఉందని వ్యాఖ్యానించారు.