ఉప్పల ప్రణీత్:చిన్న వయసులోనే గ్రాండ్ మాస్టర్ కావడం పట్ల కేసీఆర్ హర్షం
శిక్షణ, ఇతర ఖర్చుల కోసం రూ. 2.5 కోట్లు
హైదరాబాద్, మే 15 (విశ్వం న్యూస్) : అత్యంత పిన్న వయస్సులోనే చెస్ క్రీడలో అంతర్జాతీయ ఖ్యాతి గడించిన తెలంగాణ చెస్ క్రీడాకారుడు ఉప్పల ప్రణీత్ (16) ‘వరల్డ్ చెస్ ఫెడరేషన్ గ్రాండ్ మాస్టర్’ హోదాకు అర్హత సాధించడం పట్ల ముఖ్యమంత్రి కె.చంద్రశేఖర్ రావు హర్షం వ్యక్తం చేశారు. ఈ మేరకు ఫెడరేషన్ వారు గ్రాండ్ మాస్టర్ హోదాను ప్రకటించిన నేపథ్యంలో సీఎం కేసీఆర్ ప్రణీత్ ను, వారి తల్లిదండ్రులను సోమవారం సెక్రటేరియట్ కు పిలిపించుకుని, ప్రణీత్ ను దీవించారు. కష్టపడి ప్రణీత్ కు శిక్షణ ఇప్పించి, గొప్పగా తీర్చిదిద్దిన తల్లిదండ్రులను ఈ సందర్భంగా సీఎం అభినందించారు. చెస్ క్రీడ పట్ల ప్రణీత్ కున్న అభిరుచి, కఠోర సాధనే తనను గ్రాండ్ మాస్టర్ గా తీర్చిదిద్దాయని సీఎం అన్నారు.
భవిష్యత్ లో ప్రణీత్ మరిన్ని ఉన్నత శిఖరాలకు చేరుకోవాలని, తెలంగాణకు, భారతదేశానికి గొప్ప పేరు, ప్రఖ్యాతులు తీసుకురావాలని సీఎం కేసీఆర్ ఆకాంక్షించారు. అందుకు రాష్ట్ర ప్రభుత్వ సంపూర్ణ సహకారం ఉంటుందని సీఎం స్పష్టం చేశారు. ఈ సందర్భంగా భవిష్యత్ లో ప్రణీత్ చెస్ క్రీడలో సూపర్ గ్రాండ్ మాస్టర్ గా ఎదిగేందుకు కావాల్సిన శిక్షణ, ఇతర ఖర్చుల కోసం రూ. 2.5 కోట్లను సీఎం కేసీఆర్ ప్రకటించారు.
ఈ సందర్భంగా ప్రణీత్ తల్లిదండ్రులు సీఎం కేసీఆర్ గారికి ధన్యవాదాలు తెలిపారు. రాష్ట్ర ప్రభుత్వం క్రీడాకారులకు ప్రోత్సాహకాలు అందిస్తూ, క్రీడారంగాభివృద్ధికి తీసుకుంటున్న చర్యలు సత్ఫలితాలనిస్తున్నాయనడానికి ప్రణీత్ గ్రాండ్ మాస్టర్ గా ఎదిగిన తీరే నిదర్శనమని సీఎం అన్నారు.
- సీఎం కేసీఆర్ గారికి కృతజ్ఞతలు
తెలిపిన రాష్ట్ర మంత్రి
డాక్టర్ వి. శ్రీనివాస్ గౌడ్ - చెస్ క్రీడాకారుడు ఉప్పల ప్రణీత్ ‘వరల్డ్ చెస్ ఫెడరేషన్ గ్రాండ్ మాస్టర్’ అర్హత సాధించినందుకు రాష్ట్ర మంత్రి డాక్టర్ వి శ్రీనివాస్ గౌడ్ అభినందనలు.
- అత్యంత పిన్న వయస్సులో తెలంగాణ రాష్ట్రానికి చెందిన చదరంగం (చెస్) క్రీడాకారుడు ఉప్పల ప్రణీత్ (16) ‘వరల్డ్ చెస్ ఫెడరేషన్ గ్రాండ్ మాస్టర్’ అర్హత సాధించినందుకు రాష్ట్ర ఎక్సైజ్ క్రీడా పర్యాటక సాంస్కృతిక పురావస్తు యువజన సర్వీసుల శాఖల మంత్రి డాక్టర్ వి శ్రీనివాస్ గౌడ్ అభినందనలు తెలియజేశారు.
- భవిష్యత్ చదరంగం క్రీడలో ప్రణీత్ ఎన్నో చిరస్మరణీయ విజయాలు సాధించి రాష్ట్రానికీ, దేశానికి గొప్ప పేరు, ప్రఖ్యాతులు తీసుకురావాలని మంత్రి డాక్టర్ వి. శ్రీనివాస్ గౌడ్ కోరుకున్నారు. సీఎం కేసీఆర్ గారి ఆదేశాల మేరకు తెలంగాణ రాష్ట్రానికి చెందిన క్రీడాకారులను అంతర్జాతీయ స్థాయిలో రాణించేందుకు క్రీడా శాఖ తరుపున ఎంతో ప్రోత్సాహం అందిస్తున్నామన్నారు.
- భవిష్యత్ లో ప్రణీత్ చెస్ క్రీడలో సూపర్ గ్రాండ్ మాస్టర్ గా రాణించేందుకు కావాల్సిన ఆధునిక శిక్షణ, ఇతర అవసరాల కోసం రూ. 2.5 కోట్లను సీఎం కేసీఆర్ ప్రకటించినందుకు మంత్రి డాక్టర్ వి. శ్రీనివాస్ గౌడ్ కృతఙ్ఞతలు తెలిపారు.