- కాంగ్రెస్-డీఎంకే విభేదాలతో ప్రాంతీయ శక్తుల ఐక్యతకు కొత్త ఊపు
- కేంద్ర రాజకీయాల్లో కేసీఆర్ ఫెడరల్ ఫ్రంట్ ఆలోచన మళ్లీ చర్చనీయాంశం
హైదరాబాద్, మే 9 (విశ్వం న్యూస్) : 2026 తమిళనాడు ఎన్నికల రాజకీయ పరిణామాలు దేశ రాజకీయ సమీకరణాలను పూర్తిగా మార్చే దిశగా సాగుతున్నాయని రాజకీయ విశ్లేషకులు అభిప్రాయపడుతున్నారు. డీఎంకే వంటి కీలక మిత్రపక్షాన్ని పక్కన పెట్టి కాంగ్రెస్ తీసుకుంటున్న నిర్ణయాలు ఇండియా కూటమిలో చీలికలకు దారి తీస్తున్నాయని భావిస్తున్నారు.
తమిళగ వెట్రి కళగం (TVK) ఎదుగుదలతో పాటు కాంగ్రెస్ వైఖరిలో వచ్చిన మార్పులు కేవలం తమిళనాడుకే పరిమితం కాకుండా దేశవ్యాప్తంగా ప్రాంతీయ పార్టీలను ఒకే వేదికపైకి తీసుకురావడానికి కారణమవుతున్నాయి. తాత్కాలిక రాజకీయ లాభాల కోసం కాంగ్రెస్ పాత మిత్రబంధాలను వదులుకుంటోందనే విమర్శలు వెల్లువెత్తుతున్నాయి.
డీఎంకేను దూరం చేయడం కాంగ్రెస్కు నష్టమే : దక్షిణ భారతదేశంలో కాంగ్రెస్కు డీఎంకే ఎప్పుడూ బలమైన మిత్రపక్షంగా నిలిచింది. క్లిష్ట సమయాల్లో కూడా కాంగ్రెస్కు అండగా నిలిచిన డీఎంకేను ఇప్పుడు పక్కన పెట్టడం రాజకీయంగానే కాక భావోద్వేగపూరితంగా కూడా పెద్ద దెబ్బగా మారిందని విశ్లేషకులు చెబుతున్నారు.
నేషనల్ హెరాల్డ్ కేసు సమయంలోనూ, రాహుల్ గాంధీపై తీవ్ర విమర్శలు వచ్చిన సందర్భాల్లోనూ డీఎంకే బహిరంగ మద్దతు ప్రకటించింది. అలాంటి పార్టీతో విభేదాలు పెరగడం కాంగ్రెస్పై విశ్వాస సంక్షోభాన్ని మరింత పెంచిందని రాజకీయ వర్గాలు అభిప్రాయపడుతున్నాయి.
‘ఫెడరలిజం’ భావన బలహీనమవుతోందా? : దేశవ్యాప్తంగా ప్రాంతీయ పార్టీలను కాంగ్రెస్ దూరం చేసుకుంటోందనే అభిప్రాయం బలపడుతోంది. పశ్చిమ బెంగాల్లో మమతా బెనర్జీ, ఢిల్లీలో అరవింద్ కేజ్రీవాల్, ఉత్తరప్రదేశ్లో అఖిలేష్ యాదవ్ వంటి నేతలతో ఏర్పడుతున్న విభేదాలు అదే సంకేతాన్ని ఇస్తున్నాయని రాజకీయ విశ్లేషకులు పేర్కొంటున్నారు.
ప్రాంతీయ పార్టీల బలాన్ని తగ్గించే ప్రయత్నాలు సమాఖ్య వ్యవస్థకు ప్రమాదకరమని పలువురు అభిప్రాయపడుతున్నారు. దీంతో ఫెడరల్ రాజకీయాల అవసరం మరింత స్పష్టమవుతోందని చెబుతున్నారు.
మూడో ఫ్రంట్కు అనుకూల వాతావరణం : కాంగ్రెస్ తన సంప్రదాయ మిత్రపక్షాలను కోల్పోతుండగా, ప్రాంతీయ శక్తులు ఐక్యంగా ముందుకు వచ్చే పరిస్థితులు కనిపిస్తున్నాయి. మమతా బెనర్జీ, అఖిలేష్ యాదవ్, ఎం.కే. స్టాలిన్ వంటి నేతలు పరస్పర మద్దతు తెలుపుతున్న తీరు కొత్త రాజకీయ సమీకరణాలకు దారితీస్తోందని భావిస్తున్నారు.
కేసీఆర్ ఫెడరల్ ఫ్రంట్ ఆలోచన మళ్లీ కేంద్రబిందువుగా : కాంగ్రెసేతర, బీజేపీయేతర ఫెడరల్ ఫ్రంట్ ఆలోచనను ముందుకు తీసుకొచ్చిన నాయకుడిగా బీఆర్ఎస్ అధినేత కేసీఆర్ పేరు మరోసారి దేశ రాజకీయాల్లో వినిపిస్తోంది. ప్రాంతీయ పార్టీల ఐక్యత, రాష్ట్రాలకు అధిక అధికారాలు, సమాఖ్య వ్యవస్థ బలోపేతం, అభివృద్ధి-సంక్షేమ సమతుల్యత వంటి అంశాలతో కేసీఆర్ ప్రతిపాదించిన ఫెడరల్ ఫ్రంట్ ఇప్పుడు మరింత ప్రాసంగికంగా మారిందని రాజకీయ పరిశీలకులు భావిస్తున్నారు.
కాంగ్రెస్ వైఖరితో కొత్త రాజకీయ సమీకరణాలు : తాత్కాలిక రాజకీయ లాభాల కోసం కాంగ్రెస్ తీసుకుంటున్న నిర్ణయాలు భవిష్యత్తులో దేశ రాజకీయాల్లో పెద్ద మార్పులకు దారి తీసే అవకాశముందని విశ్లేషకులు చెబుతున్నారు. అదే సమయంలో ప్రాంతీయ పార్టీల ఆధారంగా కొత్త ఫెడరల్ ఫ్రంట్ ఏర్పడితే అది జాతీయ రాజకీయాల్లో కీలక శక్తిగా ఎదిగే అవకాశముందని అభిప్రాయపడుతున్నారు.
– ప్రొఫ్. శ్రవణ్ దాసోజు
న్యాయవాది & బీఆర్ఎస్ ఎమ్మెల్సీ